Monday, October 13, 2014

ആൽബർട്ട കാഴ്ചകൾ - ഫോർട്ട്‌ എഡ്മണ്‍ഡണ്‍ പാർക്ക് (അവസാന ഭാഗം)

ഇപ്പോൾ നമ്മൾ നിൽക്കുന്നത് ഈ പാർക്കിലെ അവസാന തെരുവായ  1920 സ്ട്രീറ്റിലാണ് ...!

ആധുനികതയുടെ കടന്നു വരവ് എഡ്മണ്‍ഡണിനെ ആകെ മാറ്റിമറിച്ചു. മോട്ടോർ വാഹനങ്ങൾ നിരത്തുകളിൽ നിറഞ്ഞു. ഇക്കാലത്താണ് കാനഡയുടെ ആദ്യത്തെ മുൻസിപ്പൽ വ്യോമതാവളം എഡ്മണ്‍ഡണിൽ നിർമിക്കപ്പെട്ടത്...  വിമാനങ്ങൾ സൂക്ഷിക്കാനുള്ള കൂടാരത്തിന്റെയും വിമാനത്തിന്റെയും  ഒരു ചെറുപകർപ്പ്  ഇവിടെ ഈ പാർക്കിൽ ഉണ്ട് .
വ്യോമയാന താവളം 
Replica of Avro -avian biplane 
കാപ്പിറ്റോൾ തിയ്യറ്ററാണ് ഈ തെരുവിലെ മറ്റൊരാകർഷണം . 1929-ൽ ഉദയം കൊണ്ട പ്രദർശനശാലയുടെ   തനിപ്പകർപ്പാണിതെങ്കിലും ആധുനിക നിർമാണ രീതികളും ഫോർട്ട്‌ എഡ്മണ്‍ഡണ്‍ പാർക്കിലെ ഇതിന്റെ നിർമിതിക്കായി ഉപയോഗപ്പെടുത്തിയിട്ടുണ്ട്. പഴയതിനേക്കാൾ കൂടുതൽ ഇരിപ്പിടങ്ങൾ ഏർപ്പെടുത്തിയിരിക്കുന്നു. ഇവിടെ സിനിമയും നാടകവും പ്രദർശിപ്പിക്കുന്നുണ്ട്.  സമയക്കുറവു മൂലം പ്രദർശനം കാണാൻ നിന്നില്ല.
കാപ്പിറ്റോൾ പ്രദർശനശാല  

ഈ തെരുവിൽ കാപ്പിറ്റോൾ തിയ്യേറ്ററിന് എതിർവശത്തായിട്ടാണ് മരുന്നുകടയും മധുരപലഹാരക്കടയും സ്ഥിതി ചെയ്യുന്നത്. പൂർവ കാലത്തിലും ഇവ ഒരുമിച്ചു തന്നെയായിരുന്നു, ഒരേ കെട്ടിടത്തിൽ തന്നെയായിരുന്നു. പ്രവർത്തനമാരംഭിച്ചതും ഒരേ കാലത്തു തന്നെ... 1922 -ൽ . 1967 ൽ ജീർണത കാരണം പൊളിച്ചു കളയേണ്ടി വന്നുവെങ്കിലും അതേ മാതൃകയിൽ തന്നെയാണ് ഈ പാർക്കിൽ പുനർനിർമിക്കപ്പെട്ടിരിക്കുന്നത്. രുചിയും അന്നത്തെ കാലത്തേത് തന്നെയായിരിക്കാൻ വേണ്ടി അതേ ചേരുവകളും പാചകരീതികളും പിന്തുടരുന്നുവെന്ന് അറിഞ്ഞതിനാൽ ഒരു വെണ്ണ ബിസ്ക്കറ്റ് വാങ്ങിക്കഴിച്ചു.... ബാല്യത്തിലെങ്ങോ പറഞ്ഞു കേട്ട നാവിലലിയുന്ന ബിസ്ക്കറ്റ് ...! :) പെട്ടന്ന് അമ്മയമ്മൂമ്മമാരെ ഓർത്തു പോയി, അവരാരെങ്കിലും കൂടെയുണ്ടായിരുന്നെങ്കിൽ, ആ രുചി ഒരിക്കൽ കൂടി അവർക്കു നൽകാമായിരുന്നുവല്ലോ  ...!
 മരുന്നുകടയും പലഹാരക്കടയും ....
നഗരം വളർന്നു തുടങ്ങിയപ്പോൾ എഡ്മണ്‍ഡണ്‍ മറ്റു മേഖലകളിലേക്കും ശ്രദ്ധ പതിപ്പിക്കാൻ തുടങ്ങി. അതിന്റെ ഭാഗമായാണ് മിനി ഗോൾഫ് കോഴ്സുകൾ നഗരത്തിന്റെ പല ഭാഗങ്ങളിലായി ആരംഭിച്ചത്. അന്നത്തെ ഒരു മിനി ഗോൾഫ് കോഴ്സ് ഫോർട്ട്‌ എഡ്മണ്‍ഡണ്‍ പാർക്കിലും പുനരാവിഷ്ക്കരിച്ചിരിക്കുന്നു.....    
മിനി ഗോൾഫ് കോഴ്സ് 
കാനഡയിലെ ആദ്യത്തെ മോസ്ക് പിറവി കൊണ്ടതും  എഡ്മണ്‍ണിലാണ്, 1938ൽ ... അന്ന് ഏതാണ്ട് എഴുന്നൂറോളം അംഗങ്ങളുണ്ടായിരുന്ന മുസ്ലിമുകൾക്കു വേണ്ടി ഹിൽവി ( Hilwi Hamdon) എന്ന മഹതിയാണ് അന്നത്തെ മേയറോട് ആരാധനാലയത്തെക്കുറിച്ച് സംസാരിച്ചത്. എല്ലാ മതസ്ഥരുടേയും സഹകരണത്തോടെ  നിർമിക്കപ്പെട്ട ഈ ദേവാലയത്തിനുള്ളിൽ ഇരിക്കുമ്പോൾ, മതസൗഹർദ്ദവും സഹിഷ്ണുതയും നഷ്ടപ്പെട്ട ഇന്നത്തെ   ലോകത്തെക്കുറിച്ചായിരുന്നു ആകുലത മുഴുവൻ.... ! മുസ്ലിം സമൂഹം വളരുകയും പഴയ ദേവാലയം അപര്യാപ്തമാവുകയും ചെയ്തപ്പോൾ മറ്റൊരിടത്ത് പുതിയതൊന്ന് പണി കഴിപ്പിച്ചു. അങ്ങിനെയാണ് ചരിത്രത്തിന്റെ ഭാഗമായ പഴയ  ആരാധനാലയം ഈ പാർക്കിലേക്ക് മാറ്റി സ്ഥാപിക്കപ്പെട്ടത്.
Al - Rashid Mosuqe

ഈ പാർക്കിലെ മറ്റൊരു പ്രധാന ആകർഷണമാണ്‌ മോട്ടോർഡോം. പഴയതും പുതിയതുമായ മോട്ടോർ വാഹനങ്ങളുടെ വില്പനക്കും സൂക്ഷിച്ചു വെക്കലിനും കേടുപാടുകൾ പോക്കലിനുമൊക്കെയായിട്ടാണ് 1919ൽ ഈ സ്ഥാപനം ആരംഭിച്ചത്. ഈ പാർക്കിലെ 1920 തെരുവിൽ അന്നത്തെ വാഹനങ്ങളുടെ പ്രദർശനവും ആവശ്യപ്പെടുന്നവർക്ക് സവാരിയും ഏർപ്പെടുത്തിയിരിക്കുന്നു. ഓടിനടന്നാൽ പോലും ഈ പാർക്കു മുഴുവൻ കണ്ടു തീരാൻ ഒരു ദിവസം പോരാ ... ചിത്രത്തിൽ കാണുന്ന മോട്ടോർ സൈക്കിൾ പിന്നേം പിന്നേം ഒരു സവാരിക്കായി മോഹിപ്പിക്കുണ്ടായിരുന്നു, എന്നിട്ടും ഒത്തിരി നേരം കാത്തു നിൽക്കേണ്ടി വരുമെന്നതിനാൽ മനസില്ലാമനസോടെ ആ മോഹം ഉപേക്ഷിക്കേണ്ടി വന്നു.....
Motordome

ദാ , നോക്കൂ... സ്ട്രീറ്റ് കാറല്ലേ അത്...? നമുക്കൊന്ന് ചുറ്റിടയിച്ചു വന്നാലോ... ഈ തെരുവിനെ ചുറ്റി ഒരു കിലോമീറ്റർ ദൂരത്തിൽ ഒരു സവാരിയാവാം. നമ്മൾ മുൻപ് കണ്ട പല കാഴ്ചകളും ഒന്നുകൂടി കാണാം, ഒപ്പം നടന്നു തളർന്ന കാലുകൾക്ക് ഒരു വിശ്രമവുമാകും ഈ യാത്ര.... 1908 - ലാണ് എഡ്മണ്‍ഡണിൽ സ്ട്രീറ്റ് കാർ അഥവാ ട്രാം സർവീസ് തുടങ്ങിയത്. എഡ്മണ്‍ഡണിന്റെ ജീവനാഡിയായി, നഗരവാസികളെ ലക്ഷ്യസ്ഥാനത്ത് എത്തിക്കാനായി വിശ്രമമില്ലാതെയുള്ള ഓട്ടം 1951 വരെ തുടർന്നു. പിന്നെ, ചുറുചുറുക്കോടെ പാഞ്ഞു പോകുന്ന പുതുതലമുറക്കായി വഴിയൊഴിഞ്ഞു കൊടുത്തു.... അവരാകട്ടെ,  ഈ പാർക്കിൽ ഒരു വിശ്രമസ്ഥലമൊരുക്കി   ട്രാം മുത്തശ്ശിയെ നന്നായി പരിപാലിക്കുന്നു, അഭിമാനത്തോടെ ഭാവിതലമുറയെ പരിചയപ്പെടുത്തുന്നു....
street cars & barn

LRT - the new generation tram

പാതക്കപ്പുറത്തു കാണുന്നതാണ് മെലൻ ഫാം. ഈ പാർക്കിരിക്കുന്ന സ്ഥലം മെല്ലൻ കുടുംബത്തിന്റെ സ്വത്തായിരുന്നു. അവരത് പാർക്കിനു വേണ്ടി വിട്ടു കൊടുത്തതാണ്, ഒപ്പം അവിടെയുണ്ടായിരുന്ന അവരുടെ ഫാം ഹൗസും കളപ്പുരയും... 1922 ൽ പണി കഴിപ്പിച്ചതാണ്‌ ഈ ഫാം ഹൗസ്... 
Mellon farm house & barn
പിന്നെ കണ്ടത്, അന്നത്തെ ആധുനിക മാതൃകയിൽ പണി കഴിപ്പിച്ച ടെലിഫോണ്‍ കേന്ദ്രത്തിന്റെ പകർപ്പായിരുന്നു. പൊതുജനത്തിനുള്ള പബ്ലിക് ബൂത്തും സ്വിച്ച്ബോർഡ് മേഖലയും കാര്യനിർവഹണ പ്രവർത്തിസ്ഥലവും എല്ലാം ഈ കെട്ടിടത്തിൽ തന്നെയായിരുന്നു. അതൊക്കെ അതേ പോലെ തന്നെ ഇവിടെയും പുനരാവിഷ്ക്കരിച്ചിരിക്കുന്നു.
Telephone exchange
അവിടുന്നിറങ്ങി മുന്നോട്ടു നടന്നപ്പോഴാണ് വീഥിക്കപ്പുറത്തു നിന്നും ഒന്നാം ലോകയുദ്ധത്തിൽ കണ്ണിനു പരിക്കേറ്റ സൈനികന്റെ കൈ പിടിച്ചു ഈ മാലാഖ വന്നത്. പിന്നെ, അദ്ദേഹത്തിന് എങ്ങിനെ പരിക്കുണ്ടായി എന്നും അവരുടെ ശുശ്രൂഷയും എല്ലാം വിശദീകരിച്ചു. ഫ്ലോറൻസ് നൈറ്റിൻഗേലിനെ അനുസ്മരിച്ച് അവിടെ കൂടിയിരുന്നവർ  അവരെ അനുമോദിച്ചപ്പോൾ  താനതിനർഹയല്ലെന്നും ഇത് താൽക്കാലിക വേഷമാണെന്നും  അവർ പറഞ്ഞത് വളരെ വിനയത്തോടെയായിരുന്നു....
Nurse& army man
ഈ പാർക്കിന്റെ മറ്റേയറ്റത്ത് എത്തിയപ്പോൾ, ആദ്യം കണ്ട മിഡ് വേ പാർക്ക് തൊട്ടടുത്ത് ...! 
Midway 
പാർക്കിൽ നിന്നുള്ള അവസാനത്തെ തീവണ്ടി പിടിക്കാൻ ധൃതിയിൽ സ്റ്റേഷനിലേക്ക് നടക്കുമ്പോൾ ഈ പൈതൃകങ്ങൾ വരുംതലമുറക്കായി സൂക്ഷിക്കാൻ സന്മനസ്സു തോന്നിയവരോടുള്ള നന്ദി മനസ്സിൽ നിറഞ്ഞു.... 
Downtown
എഡ്മണ്‍ഡണ്‍ കൂടുതൽ മനോഹരിയും സ്വയംപര്യാപ്തയുമായി തന്റെ ജൈത്രയാത്ര തുടരുകയാണ്...  വർഷങ്ങൾക്കുശേഷം ഇപ്പോൾ നമ്മൾ കാണുന്ന നഗരവും ഈ പാർക്കിൽ സ്ഥാനം പിടിക്കും. അങ്ങനെ വരുംതലമുറകൾ എഡ്മണ്‍ഡണിന്റെ  വഴിത്താരകളെ അറിയുകയും അവരുടെ സംഭാവനകൾ കൂട്ടിച്ചേർക്കുകയും ചെയ്യും....  

ഫോർട്ട്‌ എഡ്മണ്‍ഡണ്‍ പാർക്ക് (മൂന്നാം ഭാഗം)

ഫോർട്ട്‌ എഡ്മണ്‍ഡണ്‍ പാർക്ക്(രണ്ടാം ഭാഗം)  

ഫോർട്ട്‌ എഡ്മണ്‍ഡണ്‍ പാർക്ക്(ഒന്നാം ഭാഗം)









Sunday, October 5, 2014

ആൽബർട്ട കാഴ്ചകൾ - ഫോർട്ട്‌ എഡ്മണ്‍ഡണ്‍ പാർക്ക് (മൂന്നാം ഭാഗം)

ഇനി നമുക്ക് അടുത്ത തെരുവിലേക്ക് പോകാം....?


1905 തെരുവാണത്. ഇവിടെ തെരുവിന്റെ കാലവും കോലവും ഒരുപാട് മാറുന്നു...

1905 തെരുവ് 
എഡ്മണ്‍ഡണ്‍ പതുക്കെ വളരുകയാണ്, ഒരു ചെറുഗ്രാമത്തിൽ നിന്നും തിരക്കുള്ള പട്ടണമായി മാറുകയാണ്.... ടാറിട്ട റോഡുകളും വൈദ്യുതദീപങ്ങളും മോട്ടോർ വാഹനങ്ങളും എല്ലാമായി തിരക്കേറുന്നു... കാൽഗറിയിൽ നിന്നും എഡ്മണ്‍ഡണിലേക്ക് തീവണ്ടി വന്നതും ഇക്കാലയളവിലാണ്. അതോടെ കുടിയേറ്റക്കാരുടെ എണ്ണത്തിൽ നല്ല വർദ്ധനയുണ്ടായി.  ഫാക്ടറികൾ, സ്കൂളുകൾ, ഓഫീസുകൾ, ആശുപത്രികൾ തുടങ്ങിയവയുമായി ഊർജ്ജസ്വലയായ ഒരു കൗമാരക്കാരിയെപ്പോലെ എഡ്മണ്‍ഡണ്‍ വളരുകയാണ്....

ഈ തെരുവിൽ ആദ്യം കണ്ടത്, ധാന്യവും കൃഷിയുപകരണങ്ങളും സൂക്ഷിക്കുന്ന കളപ്പുരയും അതിനടുത്തുള്ള ഫാം ഹൗസുമായിരുന്നു. ഈ കളപ്പുരയുടെ പ്രത്യേകത , ഇരുപത് വശങ്ങളിൽ വൃത്താകൃതിയിൽ പണിതത് എന്നതു മാത്രമല്ല, കാനഡയിലെ അവസാനത്തെ വൃത്താകാര കളപ്പുര എന്നതും കൂടിയാണ്. 1898 - ൽ നിർമിക്കപ്പെട്ട ഈ കളപ്പുര 1972 -ൽ അങ്ങിനെത്തന്നെ ഫോർട്ട്‌ എഡ്മണ്‍ഡണ്‍ പാർക്കിലേക്ക് മാറ്റി സ്ഥാപിച്ചു. കുട്ടികളും മുതിർന്നവരും കൌതുകത്തോടെ അതിനു ചുറ്റും തൊട്ടും തലോടിയും നടക്കുന്നുണ്ടായിരുന്നു. ...

ധാന്യപ്പുര 
കളപ്പുരക്കടുത്തായി ഫാം ഹൗസ്... വിശ്രമത്തിനും വിനോദത്തിനും ഈ വീട് ഉപയോഗിച്ചിരുന്നുവത്രേ.... 
Henderson's ഫാം ഹൌസ്‌ 

പെട്ടന്നുണ്ടായ കുടിയേറ്റക്കാരുടെ വർദ്ധന മൂലം ജനങ്ങൾക്ക് താമസിക്കാൻ വീടുകൾ പോരാതെ വന്നു. പൊരുതി ജീവിക്കാൻ തീരുമാനിച്ചുറപ്പിച്ചെത്തിയ ജനതയെ അതൊന്നും തളർത്തിയില്ല. അവർ, കൂടാരങ്ങളിൽ താമസിച്ചു. അങ്ങിനെയാണ് 'കൂടാരനഗരം' അഥവാ ടെന്റ് സിറ്റി രൂപം കൊള്ളുന്നത്‌. 
ടെന്റ് സിറ്റി 
ടെന്റ് സിറ്റിക്ക് പിന്നിലായി ടീ സ്റ്റാൾ, ഗിഫ്റ്റ് ഷോപ്പ്, ക്രോക്കറി എല്ലാം ചേർന്ന മിസ്റ്റർ. റീഡിന്റെ ചൈന ബസാർ... അതിന്റെ മുകൾനിലയായിരുന്നു ഡോക്ടറും എഞ്ചിനീയറും തയ്യൽക്കാരനും ഒക്കെ തങ്ങളുടെ പ്രവർത്തനശാലകളായി ഉപയോഗിച്ചിരുന്നത്. 
റീഡ്സ് ബസാർ 
ടൌണ്‍ ഹാൾ എന്നു വിളിച്ചിരുന്ന കെട്ടിടത്തിലായിരുന്നു അഗ്നിശമനസേനയും  പോലീസ് സ്റ്റേഷനും മുൻസിപ്പൽ ഓഫീസും മറ്റു ഓഫീസുകളും പ്രവർത്തിച്ചിരുന്നത്. 1893-ൽ പണിത ഈ കെട്ടിടം 1958-ൽ പൊളിച്ചു കളയേണ്ടി വന്നു. എങ്കിലും അതേ മാതൃകയിൽ തന്നെ പണിതതാണ് ഈ പാർക്കിലെ ടൌണ്‍ ഹാളും... അതിനാൽ, ഇങ്ങിനെയൊന്ന് ഇവിടെയുണ്ടായിരുന്നുവെന്ന് നമ്മൾ അറിയുന്നു...
ഫയർ സ്റ്റേഷൻ 
അവിടെ നിന്നും ഞങ്ങൾ പോയത്, പോസ്റ്റ്‌ ഓഫീസ് കെട്ടിടത്തിലേക്കാണ്. 1893-ലാണ് എഡ്മണ്‍ഡണിൽ ഈ കെട്ടിടം പോസ്റ്റ്‌ ഓഫീസിനായി പണി കഴിപ്പിച്ചത്. ഒരു വർഷം കഴിഞ്ഞ്, അതിന്റെ മുകൾനിലയിൽ ടെലിഫോണ്‍ എക്സ്ചേഞ്ച് പ്രവർത്തനം ആരംഭിച്ചു. താമസിയാതെ ഒരു വക്കീലോഫീസും.... 1981-ൽ ജീർണിച്ചു തകർന്ന കെട്ടിടത്തിന്റെ മാതൃകയാണ്‌ ഈ പാർക്കിൽ ...
പോസ്റ്റ്‌ ഓഫീസ് 

പട്ടണമായി വളരെ വേഗത്തിൽ വളരുന്നതിനാൽ എഡ്മണ്‍ഡണിന്റെ മുഖച്ഛായയും മാറുന്നു....  വിവിധങ്ങളായ ആടയാഭരണങ്ങൾ അണിഞ്ഞ് സുന്ദരിയാവുന്നു.... തൊഴിൽ തേടുന്നവരെ സഹായിക്കാൻ എംപ്ലോയ്മെന്റ് എക്സ്ചേഞ്ച്, വിനോദത്തിനായുള്ള പെന്നി ആർക്കേഡ്, കുട്ടികൾക്കായി ഗ്രാൻഡ്‌ പാർക്ക്‌, ചെടികൾക്കായുള്ള ഗ്രീൻ ഹൗസ്, ബേക്കറികൾ , പള്ളികൾ .... അങ്ങിനെയങ്ങിനെ വീഥികൾക്കിരുവശവും കെട്ടിടങ്ങൾ ഉയർന്നു.... ഒരു ഒഡ്യാണം പോലെ ട്രാം സർവീസ് എഡ്മണ്‍ഡണിന്റെ പാർശ്വങ്ങളിലൂടെ ഒഴുകി നീങ്ങി....  
പെന്നി ആർക്കേഡ് 
അങ്ങിനെ  എഡ്മണ്‍ഡണ്‍ വളർച്ചയുടെ പടവുകൾ ഓടിക്കേറി 1905-ൽ പുതിയ സംസ്ഥാനമായ ആൽബർട്ടയുടെ തലസ്ഥാനമായി ... 
ഈ തെരുവ് അവസാനിക്കുന്നത്‌ ഒന്നാം ലോക മഹായുദ്ധത്തിൽ വീരചരമമടഞ്ഞവരുടെ ഓർമ്മക്കായി തീർത്ത 'മെമ്മോറിയൽ ഗാർഡൻസിലാണ്'.   
മെമ്മോറിയൽ ഗാർഡൻസ് 

Saturday, September 20, 2014

ആൽബർട്ട കാഴ്ചകൾ - ഫോർട്ട്‌ എഡ്മണ്‍ഡണ്‍ പാർക്ക് (രണ്ടാം ഭാഗം)

പരിമിതമായ സമയവും  ഒരുപാട് കാഴ്ചകളും  ഉള്ളതിനാൽ കോട്ടക്കുള്ളിൽ നിന്നും പുറത്തു കടന്നു. നേരെ എതിർവശത്തായി സസ്ക്കാച്യുൻ -യോർക്ക്‌ കടവാണ്. വള്ളത്തിലൂടെ കച്ചവടക്കാർ എത്തിയിരുന്ന കാലമാണ് അവിടെ....

ആ കടവിൽ നിന്നും തിരിഞ്ഞു നോക്കിയപ്പോൾ വഴി രണ്ടായി പിരിയുന്നത് കണ്ടു. ഏതു വഴിയെ പോകണമെന്ന് ടോസിടാമെന്ന് മോളുടെ അഭിപ്രായം ഐക്യത്തോടെ തന്നെ പാസാക്കി, കോയിനു വേണ്ടി പഴ്സിൽ തിരയുമ്പോഴാണ് കച്ചവടക്കാരന്റെ വേഷമണിഞ്ഞ ഒരു സീനിയർ സിറ്റിസണ്‍ ഞങ്ങൾക്ക് വഴികാട്ടിയായത്. ഞങ്ങളുടെ ആദ്യ സന്ദർശനമാണെന്ന് പറഞ്ഞപ്പോൾ കോട്ടക്ക് അടുത്തു കൂടിയുള്ള വഴിയെ പോകാൻ അദ്ദേഹം നിർദ്ദേശിച്ചു. അപ്പോഴാണത്രേ ക്രമത്തിൽ ഓരോ തെരുവും കടന്നു പോകാൻ കഴിയുക. രണ്ടാമത്തെ വഴി വീണ്ടും വീണ്ടും സന്ദർശനത്തിനായി വരുന്നവർക്ക് പെട്ടന്ന് ലക്ഷ്യത്തിലെത്താനുള്ള  കുറുക്കുവഴിയാണ്. അങ്ങിനെ തിരിച്ചു കോട്ടഭാഗത്തേക്കു തന്നെ നടന്നു. അതിനു സമീപത്തുള്ള നടപ്പാതയിലൂടെ നടന്ന ഞങ്ങളെ വരവേറ്റത് ഇന്ത്യൻ സെറ്റിൽമെന്റ് ആയിരുന്നു.
അതിനപ്പുറത്തായുള്ള റോഡു മുറിച്ചു  കടക്കാൻ കാത്തു നിൽക്കുമ്പോൾ പഴയ കാലത്തെ ചവറു ശേഖരിക്കുന്ന ഒരു വണ്ടി , ഞങ്ങളെ കടന്നു പോയി. ഡ്രൈവറുടെ സൗഹൃദം ഒരു കൈവീശലിൽ ഒതുങ്ങി.

നടപ്പാത കടന്നെത്തിയത് , 1885 തെരുവിലേക്കാണ്. റെയിൽവേ വരുന്നതിനു മുൻപുള്ള കാലഘട്ടമാണ് ഈ തെരുവിൽ ....

ഈ ബോർഡിന്റെ സമീപത്തുള്ള പന്നിക്കൂടിന്റെ നാറ്റം അസഹ്യമായിരുന്നു. അതിനാൽ ആ ഭാഗത്തു നിന്നും വേഗം പോന്നു.

 എന്നാൽ, പിന്നീടാണ് മനസിലായത് അന്നത്തെ ചുറ്റുപാടുകൾ അതേപടി പുനരാവിഷ്ക്കരിക്കുന്നതിന്റെ ഭാഗമാണ്  ഇത്തരം മണങ്ങളുമെന്ന് ..... !

ബെൽറോസ് സ്കൂൾ 
പിന്നീട് ചെന്നു കേറിയത്‌ ഈ സ്കൂളിലേക്കാണ്. 1885-ൽ സ്ഥാപിതമായ ഈ സ്കൂൾ 1947 വരെ പ്രവർത്തിച്ചിരുന്നു. അന്നത്തെ അതേ കെട്ടിടം തന്നെയാണ് ഈ പാർക്കിലേക്ക് പറിച്ചു നട്ടിരിക്കുന്നത്... 
Ottewell കുടുംബത്തിന്റെ വീടും പരിസരവും ...

എഡ്മണ്‍ഡണിലെ ആദ്യ കുടിയേറ്റക്കാരായ Ottewell കുടുംബം താമസിച്ചിരുന്ന വീട്ടിലേക്കാണ് ഞങ്ങൾ പിന്നീട് പോയത്. 1880-ലാണ് ഈ കുടുംബം ഇവിടെയെത്തുന്നത്. അന്നത്തെ അവരുടെ വീടും തൊഴുത്തും കിണറുമൊക്കെ അതേപടി പുനരാവിഷ്ക്കരിച്ചിരിക്കുന്നു. കിണർ , അന്നത്തേത് തന്നെ.... വൈക്കോൽപ്പുര , നാട്ടിലെ തറവാട്ടു വീട്ടിലെ എരുത്തിലിനെ ഓർമപ്പെടുത്തി.

ഒരു നഗരം കെട്ടിപ്പടുക്കാൻ എത്തിയ കുടുംബത്തിന്റെ ഓർമ്മകൾക്കു മുന്നിൽ ഒരു നിമിഷം മൗനമായി , അവരുടെ മനോധൈര്യത്തിന് ... പൊരുതലിന്... സഹനത്തിന് .... ഒരു ബിഗ്‌ സല്യൂട്ട് ...!

കിണറിന്റെ അടിത്തട്ടിൽ മാത്രമേ വെള്ളം കണ്ടുള്ളൂ.... ആ കാണുന്ന കപ്പിയിൽ പിടിച്ചൊന്ന് വെള്ളം കോരിയാലോ എന്നാലോചിച്ചതേയുള്ളൂ, "വേണ്ടാട്ടോ, അത് മാത്രം വേണ്ടാന്ന്...." സായിപ്പ്  കണ്ണുരുട്ടി, കൂടെ "ഫോർ യുവർ സേഫ്റ്റി" ന്നും പറഞ്ഞപ്പോ... ന്നാ പിന്നെ എന്തിനാ ഒരു പരീക്ഷണം എന്നോർത്ത് പിന്തിരിഞ്ഞു...! 

ജയിൽ 
1885 ലെ ജയിലിനുള്ളിലേക്കാണ് പിന്നെ ഞങ്ങൾ എത്തിയത്. ജയിൽ വാർഡന്റെ  മുറിയും തടവറകളുമാണ് അവിടെ ഉണ്ടായിരുന്നത്. തടവുമുറികൾ ഇടുങ്ങിയതാണെങ്കിലും അതിൽ ഒരു കട്ടിലും മേശയും കസേരയുമൊക്കെയുണ്ട്. കാറ്റും വെളിച്ചവും കേറുന്ന മുറി തന്നെയാണ്. എന്നാലും ജയിൽ എന്നും ജയിൽ തന്നെയല്ലേ ല്ലേ....? 

 Mccauley - യുടെ കുതിരലായം 
Mccauley- യുടെ കുതിരലായമാണിത്. അന്നത്തെ ഒരു ടാക്സി സ്റ്റാന്റ് എന്നും പറയാം. യാത്രയ്ക്ക് കുതിരവണ്ടികൾ മാത്രമുണ്ടായിരുന്നതിനാൽ അതാവും ശരി. ഇവിടെ കുതിരവണ്ടികൾ സൂക്ഷിക്കുക മാത്രമല്ല, കുതിരകൾക്കുള്ള ഭക്ഷണവും വെള്ളവും ഒക്കെ ലഭ്യമായിരുന്നു. ഒപ്പം വിശ്രമസ്ഥലവും .....  
Methodist Church
ഇത് Methodist Church. 1873ൽ സ്ഥാപിതമായ ഈ പള്ളി 1978 ലാണ് എഡ്മണ്‍ഡണ്‍ പാർക്കിലേക്ക് പറിച്ചു നടപ്പെട്ടത്.
Bulletin Building

അന്നന്നത്തെ വാർത്തകൾ ജനങ്ങളെ അറിയിക്കാൻ ഒരു വാർത്താ പലകയാണ് ആദ്യമുണ്ടായിരുന്നത്. അതിൽ കൈകൊണ്ട് എഴുതി വെക്കുകയായിരുന്നു . പിന്നീടാണ്‌ അച്ചടിച്ച്‌ ഒട്ടിച്ചുവെക്കാൻ തുടങ്ങിയത്. വളരെ നേർത്ത കടലാസാണ് അതിനായി ഉപയോഗിച്ചിരുന്നതത്രേ. 1878 ലാണ് ഈ കെട്ടിടം പണിതത്. ഈ പാർക്കിലെ ചുരുക്കം ചില ഒറിജിനൽ കെട്ടിടങ്ങളിൽ ഇതും പെടുന്നു.

ഈ തെരുവിൽ കാഴ്ചകൾ, ഇനിയും ധാരാളം.... ചിലയിടങ്ങളിൽ ഒരു ടൈം മെഷീനിലൂടെ സഞ്ചരിക്കുന്ന പ്രതീതി... അതിനുള്ളിൽപ്പെട്ട് ആ കാലത്തിലേക്ക് ഒരു തിരിച്ചുപോക്ക് നടത്തുമ്പോൾ സ്വയം മറന്നുപോകുന്നു.... പൂർവികരെ നമിക്കുന്നു... ഒപ്പം, ആ പൈകൃതങ്ങളെ വരുംതലമുറക്കായി കാത്തു വെച്ചവരേയും ...!




Saturday, September 13, 2014

ആൽബർട്ട കാഴ്ചകൾ - ഫോർട്ട്‌ എഡ്മണ്‍ഡണ്‍ പാർക്ക് (ഒന്നാം ഭാഗം)

കാനഡയുടെ തെക്കൻ ഭൂപ്രദേശമായ  ടൊറൊന്റൊയിൽ നിന്നും ഏകദേശം മൂവായിരം കിലോമീറ്ററുകൾ സഞ്ചരിച്ച് , പടിഞ്ഞാറൻ പ്രദേശമായ ആൽബർട്ടയിൽ എത്തുമ്പോൾ ആകെയൊരു കണ്‍ഫ്യൂഷനിലായിരുന്നു. ഒരു സമയ ബോധവുമില്ലാത്ത പോലെ....! എങ്കിലും അടുത്ത ദിവസം തന്നെ സമയവുമായി പൊരുത്തപ്പെട്ടു...

ആൽബർട്ടയിലെ കാഴ്ചകൾ എന്തൊക്കെയാണ് എന്ന അന്വേഷണത്തിൽ ഒരു നീണ്ട ലിസ്റ്റ് തന്നെ കിട്ടി. അതിൽ നിന്നും അടുത്തുള്ള സ്ഥലങ്ങൾ ആദ്യം തിരഞ്ഞു പിടിച്ചു. അങ്ങിനെയാണ് ആദ്യ യാത്ര ഫോർട്ട്‌ എഡ്മണ്‍ഡണ്‍ പാർക്കിലേക്ക് എന്നു ചിന്തിച്ചത് .
പ്രവേശന കവാടം 
രാവിലെ പത്തു മുതൽ വൈകിട്ട് ആറു വരെയാണ് പാർക്ക് സമയം എന്ന് അവരുടെ സൈറ്റ് നോക്കി മോൾ പറഞ്ഞു. ഓ ..., പാർക്കിൽ എന്തോ കാണാനാ.... എന്ന സന്ദേഹത്തോടെ അവളെ നോക്കിയപ്പോൾ , എന്റെ മനസ് വായിച്ചിട്ടെന്ന പോലെ മോൾ പറഞ്ഞു, " ഇത് , സാധാരണ പാർക്കല്ല,  158 ഏക്കറിൽ പരന്നു കിടക്കുന്ന കാനഡയിലെ ഏറ്റവും വലിയ 'ലിവിംഗ് ഹിസ്റ്ററി മ്യൂസിയമാണ് ' പൂർവികർ എങ്ങിനെ ജീവിച്ചിരുന്നുവെന്ന് വായിച്ചറിവല്ലേ നമുക്കുള്ളൂ, ഫോർട്ട്‌ എഡ്മണ്‍ഡണ്‍ പാർക്കിൽ നമുക്കത് അനുഭവിച്ചും അറിയാമത്രേ...!"

എങ്കിൽ ശരി, പോയി നോക്കാം....  വലിയ പ്രതീക്ഷകൾ ഒന്നുമില്ലാതെയാണ് യാത്രക്കൊരുങ്ങിയത്.

നിറഞ്ഞ പച്ചപ്പിനുള്ളിലൂടെ നീണ്ടു പോകുന്ന ആളുകളുടെ ഒരു നിരയാണ് ആദ്യം കണ്ടത്. പാർക്കിലേക്ക് പ്രവേശിക്കാനുള്ള ടിക്കറ്റിനു വേണ്ടിയുള്ള നിരയായിരുന്നു... ഓ, പാർക്ക് മോശമല്ലെന്നു തോന്നുന്നുവെന്ന ആത്മഗതം കുറച്ചുറക്കെയായിപ്പോയെന്ന് മോൾ കണ്ണു മിഴിച്ചു നോക്കിയപ്പോഴാണ് മനസ്സിലായത്‌.

ടിക്കറ്റ് എടുത്ത് അകത്തു കേറിയപ്പോൾ , കണ്ണിൽപ്പെട്ടത് ചെറുപ്പത്തിൽ സിറ്റിയിൽ എക്സിബിഷൻ കാണാൻ പോകുമ്പോൾ കണ്ടിട്ടുള്ള അത്ഭുത ലോകം.... ഉയരത്തിൽ കറങ്ങുന്ന ചക്രവും ഊർന്നിറങ്ങി വരുന്ന നീണ്ട കോണിയും വട്ടത്തിൽ ചുറ്റുന്ന കുതിരയുമൊക്കെ  ....  !

1920 - ലെ മിഡ് വേ  പാർക്കിന്റെ ഒരു ചെറുപകർപ്പ് 
ബാല്യത്തിലേക്ക് ഒരു കുതിച്ചു ചാട്ടത്തിനൊരുങ്ങിയ എന്നെ മോൾ പിടിച്ചു നിർത്തിയത് , "ദാ ... ട്രെയിൻ വരണൂ .... " ന്ന് പറഞ്ഞാണ് .
യൂക്കോണ്‍ - പസിഫിക് സ്റ്റീം ട്രെയിൻ 
കോട്ടയിലേക്കുള്ള തീവണ്ടി കൂവിക്കൊണ്ട് സ്റ്റേഷനിലേക്ക് എത്തിച്ചേർന്നു. യാത്ര കഴിഞ്ഞെത്തിയവരുടെ മുഖങ്ങളിൽ നിറഞ്ഞു തുളുമ്പുന്ന ആവേശം...! ഓരോ പതിനഞ്ചു മിനിട്ടിലും തീവണ്ടിയുണ്ട്. അവധി ദിവസങ്ങളിൽ നല്ല തിരക്കും ഉണ്ടാവും. 1900 കളിലെ വേഷം ധരിച്ച ഡ്രൈവറും സഹായികളും കൂടാതെ ഒരു മ്യൂസിക്‌ സംഘവും വണ്ടിയിൽ ഉണ്ടായിരുന്നു. യാത്ര തുടങ്ങുന്നതിനു മുൻപേ തീവണ്ടിയുടെ ചരിത്രവും കോട്ടയുടെ ചരിത്രവുമെല്ലാം ഗൈഡ് വിശദീകരിച്ചു.
മരം കൊണ്ടുള്ള കോട്ടമതിൽ 
ഈ പാർക്കിൽ 'ഫർ ട്രേഡ് യുഗം' മുതൽ ഒന്നാം ലോക മഹായുദ്ധത്തിനു ശേഷമുള്ള മെട്രോ പോളിറ്റൻ സംസ്കാരം രൂപം കൊള്ളുന്നത്‌ വരെയുള്ള കാലഘട്ടങ്ങൾ ചിത്രീകരിച്ചിരിക്കുന്നു. വേനൽക്കാലവും അവധിക്കാലവും ആയതിനാൽ പഴയകാല വസ്ത്രങ്ങളണിഞ്ഞും  അന്നത്തെ ജീവിത രീതികൾ അനുകരിച്ചും കോട്ടയിൽ ധാരാളം ആളുകൾ സന്നദ്ധസേവകരായിട്ടുണ്ട്.  തീവണ്ടി എത്തുമ്പോൾ കോട്ടവാതിൽക്കൽ വന്നു വിനോദ സഞ്ചാരികളെ കൂട്ടിക്കൊണ്ടു പോകും. മരം കൊണ്ടുള്ള കോട്ട മതിൽ ചുറ്റി ഇടുങ്ങിയ പ്രവേശന കവാടത്തിൽ എത്തിയപ്പോൾ ഒരു കഷണം ഫർ ട്രേഡ് ചെയ്യാനായി ഞങ്ങളുടെ കൂട്ടത്തിലെ ഒരു കുട്ടിക്ക് കൊടുത്തു.
ഞങ്ങളുടെ ആതിഥേയ 
കോട്ടക്കുള്ളിൽ 1846 മുതൽ 1885 വരെയുള്ള കാലഘട്ടത്തെ പുനരാവിഷ്ക്കരിചിരിക്കുന്നു. 1915 ൽ  ജീർണിച്ചു ഇടിഞ്ഞു വീണ കോട്ടയുടെ പകർപ്പ് നാട്ടുകാരുടെ അഭ്യർത്ഥന മാനിച്ചാണ് ഈ പാർക്കിൽ പുനരാവിഷ്ക്കരിക്കപ്പെട്ടത്‌. ഒരു നിമിഷം, നമ്മുടെ നാട്ടിലെ കാര്യം ഓർത്തു പോയി...! 
 കോട്ടക്കുള്ളിൽ.... 
1974 ലാണ് സന്ദർശകർക്കായി ഈ പാർക്കിലെ ഫോർട്ട്‌ എഡ്മണ്‍ഡണ്‍ തുറന്നു കൊടുത്തത്. തുടർന്ന്പണി കഴിയുന്നതനുസരിച്ച്  മറ്റു ഭാഗങ്ങളും .... 
 ഫർ ട്രേഡിംഗ്   
ഓരോ ഭാഗത്തെ കെട്ടിടങ്ങളിലും അവധിക്കാലത്തെ താൽക്കാലിക താമസക്കാരായ സന്നദ്ധസേവകരുണ്ട്.  ഇവർ അതാത് കെട്ടിടങ്ങളെപ്പറ്റിയും അന്നത്തെ ജീവിത രീതികളും രസകരമായി വിശദീകരിക്കുന്നത് ആ ജീവിതം ജീവിച്ചു കൊണ്ടാണ്.

  

Friday, September 5, 2014

കൊളംബിയ മഞ്ഞു പാടങ്ങളിലൂടെ...


ദൂരക്കാഴ്ച 
വേനലിൽ മഞ്ഞുരുകി  ഈ നദി നിറഞ്ഞൊഴുകും  
മഞ്ഞിൽ കുത്തനെയുള്ള കയറ്റം കയറി വരുന്ന വണ്ടി 

വേനലിനായി കാത്തിരിക്കുന്ന വേഴാമ്പൽ 
മഞ്ഞുയുഗം മുതൽ .... 
 പരിശുദ്ധമാണ് ഈ ജലം എന്നവകാശപ്പെടുന്നുണ്ട് , ജീവജലമായും അറിയപ്പെടുന്നു 
ഏതു കാഴ്ചയിലും മനോഹരിയായി....

മഞ്ഞുമലയിലൂടെ  ....

1200 അടി മഞ്ഞിനു മുകളിൽ 
പാറക്കെട്ടുകൾക്കു ആയിരക്കണക്ക് അടി മുകളിലൂടെ ഒരു  ആകാശ നടത്തം... 

Related Posts Plugin for WordPress, Blogger...

സന്ദര്‍ശിക്കൂ

ജാലകം

എന്റെ കൂട്ടുകാര്‍

എന്റെ അതിഥികള്‍

  © Free Blogger Templates 'Photoblog II' by Ourblogtemplates.com 2008

Back to TOP